සීනිගම දෙවොල් දේවාලය

      ශ්‍රී ලංකාව සංචාරක පුරවරයකි. දේශීය මෙන්ම විදේශීය වශයෙන් සංචාරක ආකර්ෂණය දිනාගත් රටවල් අතර පෙරමුණේ පසු වන්නට ශ්‍රී ලංකාව ට හැකිවී ඇත. සංචාරකයන්  බහුලවම දක්නට හැකි වන්නේ වෙරළ බඩ කලාපය තුළ ය.

      ශ්‍රී ලංකාව වටා පිහිටි සුන්දර මුහුදු තීරය බහු ජන ආකර්ෂණයට ලක් ව ඇත. මේ අතර දකුණු දිග වෙරළ තීරය හා සබැඳි ස්ථාන රැසක් සංචාරකයන්ගේ  නිරන්තර ග්‍රහණය ට ලක් ව ඇත. මෙහිදී ඔබට හදුන්වා දෙන්නේ අම්බලන්ගොඩ සීනිගම දෙවොල් දේවාලය පිළිබඳව ය. 

   

  කොළඹ මාතර ප්‍රධාන මාර්ගයේ අම්බලන්ගොඩ සහ හික්කඩුව අතර සීනිගම දෙවොල පිහිටා ඇත.  ගොඩබිම සිට මීටර් 300 පමණ මුහුද මධ්‍යයට වන්නට ඉතා කුඩා දූපතක දේවාලය   දැකිය හැකි ය. මීට අධිගෘහිත දෙවියන් ව දෙවොල් දෙවියන් , රන්වන් දෙවියන් , වාසල දෙවියන් , වේරගොඩ දෙවියන් , කෙහෙල් ගමුවේ දෙවියන් , දෙවොල් බණ්ඩාර දෙවියන් , දෙවොල් කඩවර දෙවියන් , දෙවොල් පත්තිනි දෙවියන් , දොළහ දෙවියන් ආදි නාමයන් රැසකින් හදුන්වනු ලබයි. දෙවොල් දෙවියන් විදේශීය දේව සංකල්පයකි. ඉන්දියාවට අයත් දේවතාවුන් අතර දෙවොල් දෙවියන් හදුනා ගත හැක. නමුත් අද වන විට මෙරට සමාජයේ දේශීය දෙවියෙකු ලෙස දෙවොල් දෙවියන් මුල් බැස ගෙන ඇත.

     සීනිගම ප්‍රමුඛ කොට ගෙන වේරගොඩ , උඩුගල්පිට ,  ගිංතොට , උණවටුන , ලණුමෝදර , රිදියගල , හොරවල , නවගමුව වැනි ප්‍රදේශවල දෙවොල් දේව මන්දිර ඉදිව ඇත. සීනිගම දෙවොල් දේවාලය ඇතැමුන් දියඹ දේවාලය නමින් ද හදුන්වයි. දේවාල පූජෝත්සව වල සිදු කරන ගිනි පෑගීම නම් යාතු කර්මය ආරම්භ වූයේ සීනිගම දෙවොල ආශ්‍රිතව බව ට ජන මත පවතී.

    

       සීනිගම දේවාලය බොහෝ විශ්ම බල හාස්කම් පවතින ස්ථානයක් බවට මෙරැටියන් විශ්වාස කරයි. බොහෝ මිනිසුන්ගේ ප්‍රාර්ථනා ඉටුකර දෙන්නට හැකි වූ භූමියක් ලෙස දෙවොල් දේවාලය ප්‍රචලිතව ඇත. දෙවොල් දෙවියන්  නක්ෂ්ත්‍ර දන්නා දක්ෂ පළපුරුදු වෙදදුරෙක් බවත් රෝගීන්ට ආශිර්වාද කර සුව කළ බවත් ජනප්‍රවාද තුළ සදහන් වේ. මිනිසුන් තම ලෙඩදුක් කරදර බාධක රෝග උවදුරු වලට සුවය පතා දෙවොල් දෙවියන් හට කන්නලව් කර භාර හාර වෙයි.

     නමුත් සීනිගම දේවාලය වඩාත් ප්‍රසිද්ධියට පත්ව ඇත්තේ වැරදි කරුවන්ට දඩුවම් දීම අසාධාරණයන්ට හිරිහැර වලට එරෙහිව  දඩුවම් දීම   පළිගැනීම්වලට මිරිස් ඇඹරීම , පළි පොල් ගැසීම යනාදිය සදහා ය.

     දෙවොල් දෙවියන්  රෝග සුවපත් කිරීමට පැන් ලබාගත් ළිඳ පුරාණයේ සිට අද දක්වා ම සීනිගම දේවාල භූමියේ හදුනා ගත හැක. එය මුහුද මධ්‍යයේ පිහිටියත් කිවුල හෝ ලවණ ගතියක් රසයක් නොමැත. කෙතරම් දිගු ඉඩෝරයක් වූවද මෙහි ජලය සිදීමක් නොවීම හාස්කමකි. එමෙන්ම එකල ගැමියන් පළිගැනීම්වලට මිරිස් ඇඹරීම සිදු කළ මිරිස් ගල තවමත් දක්නට ලැබේ. මෙහි දී සාමාන්‍ය මිරිස් ඇඹරීමකට වඩා තරමක් වෙනස් ය. මිරිස් ගලට අබ, ගම්මිරිස් , සුදුලූනු , වියළි මිරිස් කරල් තබා ප්‍රාර්ථනා ව සිතා ඉදිරියට අඹරයි. එහෙත් නැවත පසු පසට අඹරන්නේ නැත. මන්ද යත් පළිගැනීම නැවත තමා වෙතට එන බවට මතයක් පවතී.

  

      ලෝකයේ පළමු මෙන්ම එකම මණිමේඛලා දේව ප්‍රථිමාව දක්නට ලැබෙන්නේ සීනිගම දෙවොල් දේවාලය තුළ ය.  මහනුවර දළදා පෙරහැර හා කතරගම මහ පෙරහැර හැරුණ විට ශ්‍රී ලංකාවේ විශාල ම පෙරහැර සීනිගම දෙවොල් පෙරහැර මංගල්‍යය වේ.  වසභ රජු සත් මහල් ප්‍රාසාදයක් ලෙස සීනිගම දේවාලය ගොඩනගා තිබූ බවත් විදේශීය ආක්‍රමණ හමුවේ එය විනාශ වූ බවත් පුරාණයේ සදහන් වේ. නැවත ප්‍රාදේශීය වශයෙන් බලවත් වූවන් 1964 වසරේ එය වර්තමානය තුළ පවතින ලෙස  ප්‍රතිසංස්කරණය කර ඇත.

     

    සීනිගම දේවාලය පිළිබඳ ව පවතින  පුරාවෘත රැසකි. ඉන් බහුතරය පිළිගන්නා ජනප්‍රවාදය මෙසේ ය.

     දඹදිව කුදුප්පර දේශයේ  රාමසිංහ නම් රජ කෙනෙක් විය. ඔහුට සත් සියක් බිසෝවරු සිටිය ද ප්‍රධාන බිසෝවරු සත් දෙනෙකි.  මෙම බිසෝවරු සත් දෙනා එක විට ගැබ් ගත්හ. එකම සතියක සත් දිනක එම බිසෝවරු දරුවන් ප්‍රසූත කළහ. දෙවොල් කුමාර සත් කට්ටුවේ විත්තිය තුළ මේ බව වැඩි දුරටත් සදහන් වේ.මෙම කුමාරවරු තරුණ වියට එළඹෙත්ම කළහකාරී විය.  රටවැසියන්ට හිරිහැර කරන්නට වූ නිසා පිය රජු ඔවුන් රටින් පන්නා දැමූහ. ඔවුන් නැගී ගිය නැව මුහුද මධ්‍යයේ පෙරළී ගියේ ය. මුහුදු මණිමේඛලාවන් මෙම සිදුවීම සක්‍ර දෙවියන් ට පැවසීය. සක්‍ර දෙවියන් ඔවුන් ව ලංකාව දෙසට එවීය. ලංකාවේ එවකට මුල් දේව ආසනය දැරුවේ පත්තිනි මෑණියන් ය. ඇය ගිනි කදු සතක් මවා මොවුන් බිය කරත් මොවුන් ඒවා පසු කර පැමිණියේ ය. මේ කුමාරවරු අතරින් මහාසාමි කුමරා දෙවොල් දෙවියන් ලෙස දේවත්වයට පත් වූ බව සදහන් වේ.  එකළ එහි වාසය කළ  සීනිගම නම් ප්‍රාදේශීය මැතුදු කෙනෙකුන්ගේ රෝගයක් සුව කිරීම  හේතුවෙන් සීනිගම දෙවොල සාදා පූජා කළ බවට ද තතු පවතී.

      මෙලෙස ලංකාව ට පැමිණි දෙවොල් දෙවියන් වේරගොඩ ප්‍රදේශයේ මාසාච්චි නම් පරපුරේ ස්ත්‍රියක් සරණ කරගත්  බවත් ඇය දෙවොල් දෙවියන් ගෙන් පුතකු ලද බවත් සදහන් ය. දෙවොල් දෙවියන් ගේ සෙසු සහෝදරයන් ලංකාවේ විවිධ ප්‍රදේශවල ස්ථාපිත වී ඇත. දෙවොල් දෙවියන් ගේ බිරිඳ ට රැකියාවක් නොමැති තම සැමියා නිවසට අවශ්‍ය දෑ රැගෙන එන්නේ කෙසේදැයි සැකයක් ඇතිවිය. ඇය තම පුතු  පියා පසු පස රහසේ ම යැවීය. පියා දේව බලයෙන් වස්තූන් මවනු දුටු පුතු රහස හෙළි කළේය. එය දැන කෝපාන්විත වූ දෙවොල් දෙවියන් පුතු මරා දැමීය. ඉන් දුකට පත් වූ බිරිඳ දෙවොල් දෙවියන් උමතු වන ලෙස සාප කළේය. උමතු ව සැරිසැරූ දෙවොල් දෙවියන් උණවටුන ප්‍රදේශයට පැමිණ සිත එක් කොට භාවනා කර සිහි උපදවා නැවත රෝගීන් සුවපත් කළ බව සදහන් ය. 

    සීනිගම දෙවොලේ විශ්මිත හාස්කම් පවතින බව අදටත් ජන විශ්වාසය යි. සුනාමි අනතුරු අවස්ථාව තුළ වූවද සීනිගම දෙවොල් දේවාලයට  සැලකිය යුතු හානියක් සිදු නොවී ය.            

     

දෙවොල් දෙවියන්  ධීවරයින් හා  ඔවුන්ගේ බෝට්ටු ආදිය  රැක දෙන්නේයැයි විශ්වාසයක් ද ජනයා අතර පවතී.  යහපත් මෙන් ම අයහපත් අරමුණු ද මුල් කොට ගෙන වන්දනාමානයට පාත්‍ර වන දෙවි කෙනෙකු ලෙස දෙවොල් දෙවියන් හදුනා ගත හැක.

    ඉතා සුන්දර භූමියක පිහිටි දෙවොල් දේවාලය අදටත් විශාල බැතිමතුන් පිරිසකගේ වන්දනාමානයට පාත්‍ර වේ. විශ්මිත  හාස්කම් බලය පවතින බවට ප්‍රචලිතව ඇති නිසා ම දිවයිනේ නන් දෙසින් සීනිගම දෙවොල් දේවාලය වෙත ජනයා ආකර්ෂණය වේ. දකුණු වෙරළේ සංචාරය කරන සැම මග නොහැර ගත යුතු ස්ථානයක් ලෙස දෙවොල් දේවාල භූමිය හදුන්වා දිය හැකිය.

මූලාශ්‍ර  : සිංහල දේව පුරාණය කේ.එන්.ඕ ධර්මදාස , එච්.එම්.ඒ.එස් තුන්දෙණිය

                සීනිගම දේවාලය facebook.com

                ශාස්ත්‍රපති නෝමන් සිරිපාල සූරීන්ගේ නිබන්ධනය