උස්සන්ගොඩ ජාතික වනෝද්‍යානය
දකුණු ලක පිහිටි තවත් සුන්දර වැදගත් වටිනාකමකින් යුතු ස්ථානයක් පිළිබඳ තතු මෙලෙස ගෙන හැර පෑ හැක. හුංගම , කළමැටිය , කුරුළු අභය භූමියට යාබද ව අම්බලන්තොට වැලිපටන්විල ප්රදේශයේ පිහිටි උස්සන්ගොඩ ජාතික වනෝද්‍යානය විශාල සංචාරක ආකර්ෂණයක් දිනා ගත් පාරාදීසයක් ලෙස හදුන්වා දිය හැක.
ශුෂ්ක පරිසර පද්ධතියක පිහිටි පුරා විද්‍යාත්මක උරුමයක් ලෙස නම් කර ඇති උස්සන්ගොඩ අභය භූමිය හෙක්ටයාර් 349 පමණ භූමි භාගයක පැතිර පවතී. වනජීවී දෙපාර්තමේන්තුව 2010 සැප්තැම්බර් මස 30 වන දින මෙරට 21 වන ජාතික උද්‍යානය ලෙස උස්සන්ගොඩ ජාතික උද්‍යානය ගැස්ට් කර ප්‍රකාශ කර ඇත.
උස්සන්ගොඩ පිළිබඳ ජනප්‍රවාද රැසකි. පස පිළිබඳ පරීක්ෂණ පවත් වන පරීක්ෂකයන් පවසන්නේ මීට වසර බිලියන 15 පමණ පෙර උල්කාපාතයක් පොළොව මතට කඩා වැටී ගිනි ගැනීම නිසාවෙන් මෙම අභය භූමියේ පස හා පාෂාණ පිළිස්සී රතු පැහැයෙන් යුක්ත වූ බවයි.
අතීතයේ රාවණා රජුගේ දඩුමොනරය නැමති යානය ගොඩ බස්වන ලද්දේ මෙහි බව ද රාවණා රජුගේ මාළිගාවක් මෙම ස්ථානයේ පැවති බවට ද මත පවතී. මංගර නම් දිව්‍ය පුත්‍රයා මෙහි විසූ බවද සදහන් වේ. කහ කුරුලු සංදේශයේ මෙන් ම බලි තොවිල් , මංගර හෑල්ල , මහසෝන් සමයම , දෙවොල් මඩු ශාන්ති කර්මය ආදියේ ද උස්සන්ගොඩ පිළිබඳ සදහන් වේ. අතීතයේ උස්සන්ගොඩ අනුහස් පැවති ස්ථානයක් බවත් මෙම භූමියට ඇතුළු වන මිනිසුන්ට උණ රෝගයක් වැළදුනු බවත් ආදිය නිසා මෙහි අදෘශ්‍යමාන බලයක් පවතින බවට ගැමි විශ්වාසයක් ඇත.
උස්සන්ගොඩ රතු පස් භූමියේ ආවාටයක් වැනි වළක් තිබේ. . මෙය උල්කාපාතයක් කඩා වැටීමෙන් ‘උස් වූ ගොඩ’ පසුකාලීනව උස්සන්ගොඩ වූ බවට ජනප්‍රවාදයක් පවතී.”මංගර දෙවියන්ට වාහනය වෙලා තිබෙන්නේ කුළු මීමෙක්. ‘කදිර’ කියන්නේ එම කුළු මීමගෙ නම. දිනක් මෙම කදිර උස්සන්ගොඩ තිබෙන වළේ බැහැල තියෙනවා. ඒ වෙලාවෙ මංගර දෙවියො කිව්වලූ කදිර ගොඩ කියලා. ඒ කියන්නේ කදිරට ගොඩ එන්න කියලා. අද ‘කදිරගොඩ’ කියලා නම හැදිල තියෙන්නේ එම මංගර දෙයියො නිසා.” බවට ද අදහස් පවතී.
මානාභරණ නම් රජතුමා ඉස්සර උස්සන්ගොඩ රජමාළිගයක් හදාගෙන සිටි බවට ද කථාවක් තිබේ. පසු ව මහ මුහුදට ඒ රජ මාළිගාව බිලිවුන බවද කියවේ. ”පරෙයිගල” නැමැති ස්ථානයේ පිහිටි එම රජ මාලිගයේ සිටි රජතුමා යුද්ධයකට ගිය බවත් තමා ජයග‍්‍රහණය කළහොත් සුදු කොඩියක් ද, මිය ගිය හොත් කළු කොඩියක් ද රාජ පුරෂයින් විසින් රැගෙන එනු ඇති බව රජු සිය භාර්යාවන් සත් දෙනාට පවසා තිබේ.
අනතුරුව යුද්ධය ජයග‍්‍රහණය කොට පැමිණෙන රජු සිය භාර්යාවන්ට විහිළුවක් කිරීමට සිතා තමා මිය ගිය බව හඟවමින් කළු කොඩියක් ඔසවා ගෙන යාමට අණ කොට ඇත. සිය සැමියා මිය ගිය ගොස් ඇතැයි සිතූ භාර්යාවෝ සත් දෙනා සිය දිවි නසා ගන්නට සිතා උස්සන්ගොඩ අසලින් මුහුදට වැටුණු වලවේ ගඟේ අතුගංගාවක් වන ”කොටි ආර” නැමති ඇළ දිගේ ඉහළට ගොස් තිබේ. එහෙම ගොස් ආභරණ ආදිය ගලවා තබා ගඟට පැන්න ස්ථානය අද ද ”ආභරණ ඇල්ල” ලෙස හඳුන්වයි. එසේ පනින ලද එක් බිසවකගේ පණ බේරා ගැනීමට එම ප්රදේශයේ සිටි රොඞී කුලයේ පුද්ගලයෙක් සමත් විය. ජල පහරට ගසාගෙන යන රජ බිසවක් වෙත කුල්ලක් දමා ඇය ගේ දිවි බේරා ගත් බව කියවේ. පසුව එම රජ බිසව ඔහුගේ බිරිය බවට පත් කර ගෙන ඇත. උස්සන්ගොඩට නුදුරු ”රොඞී මෑල්ල” ට එම නම කියන්නේ මේ ජනප්‍රවාදය නිසාය.
උස්සන්ගොඩ පිහිටි රතු පස් තැනින් තැන උණු වූ යකඩ නොහොත් පාෂාණ විශේෂයක් දැක ගත හැකිය. මෙම රතු පස නිසා මෙහි ශාක නොවැඩේ. භූමිය පුරා කටු වන ලැහැබ පිහිටීම නිසා කාන්තාරයක ක්ෂේම භූමියක ස්වරූපයෙන් යුතුය. ශාක පැළවීමක් දැකිය නොහැකි අතර සුළං මගින් වෙනත් පස් අංශු ගෙන ඒම නිසා ආසන්නයේ පවතින කළමැටිය අභය භූමියේ ඇති කරඹ, පතොක්, එරමිණියා ආදී මෙම පරිසරය තුළ රදා පැවතිය හැකි ශාක වන ලැහැබක් ලෙස තැනෙන් තැන දැකිය හැක.
උස් නොවූ තැනිතලා භූමියක අක්කර සියයක පමණ ගස් වැල් උසට නොවැඩී බිම් මට්ටමේ පවතී. දේවදාර, සූර්‍ය් ක්‍රාන්ති, විශ්ණු ක්‍රාන්ති, චන්ද්‍ර ක්‍රාන්ති වැනි ඖෂධීය ශාක කිහිපයක් පමණක් මෙහි දැක ගත හැකි වේ. ශාක ස්ථරය අවම හෙයින් වන සත්ත්ව ගහනය සීමිත ය. පක්ෂීන් ද අවම ය.
ලංකාවේ නව ගුවන් තොටුපළ පිහිටා තිබෙන්නේ හම්බන්තොට යි. එ මෙන් ම ලංකාවේ පළවෙනි ගුවන් තොටුපළ ගැන තොරතුරු වාර්තා වන්නේ ද හම්බන්තොට දිස්ත්‍රික්කයෙනි. එය උස්සන්ගොඩයි. උස්සන්ගොඩ තිබෙන්නේ මුහුද අද්දර තිබෙන තැනිතලාවක් මතය.මේ තැනිතලාව තරමක් හොර්ටන් තැන්නට සමානය. මෙතන තිබෙන්නේ රතු පස් හා අමුතු ජාතියේ ගල් කැබලි යි. තවද මෙතන වෙරළේ දක්නට ලැබෙන ස්වභාවය හරි අමුතුය. මේ අපුරු භූමියේ ගස් වැල් වැවෙන්නේ සීමිතවය . තිබෙන්නේ තෘණ විතරකි.
උස්සන්ගොඩ ජාතික වනෝද්‍යානයට පිවිසීමට වනජීවි කාර්‍යාලය මගින් ප්‍රවේශ පත්‍රයක් ගැනීම අවශ්‍ය වේ. වාහන වලින් ආසන්නයටම ගමන් කළ හැක. පවුලේ අය සමග එකතු වී නරඹන්නට යා හැකි සුන්දර ස්ථානයක් ලෙස උස්සන්ගොඩ පෙන්වා දිය හැක.
උස්සන්ගොඩ ට පැමිණෙන සංචාරකයන් තැන තැන කැළිකසළ දැමීම නිසා පරිසර පද්ධතියට හානි සිදු වී ඇත. උස්සන්ගොඩ සම්බන්ධ ව වගකිව යුත්තන්ගේ අවධානය තවමත් යොමු වී නැත.
සංචාරකයන් ලෙස සුන්දරත්වය විද අන් අයටත් ඒ හැගීම ලබා ගැනීමට හැකි පරිදි පරිසරය තබා ගැනීමට කටයුතු කළ යුතුය. එවිට මතුවටත් එම ස්ථාන නැරඹීමට සැමට අවස්ථාව හිමි වනු ඇත.
මූලාශ්‍ර
https://www.tripadvisor.com
https://www.elakiri.lk
https://www.srilankatrips.com
.jpeg)
.jpeg)
No comments:
Post a Comment